蜘蛛俠同 Justin Bieber 都撐嘅 NFT – inBetweeners ?

早前 CoinDaily 介紹過歌手 Justin Bieber 入左手嘅 NFT — inBetweeners 熊仔 NFT，呢兩日最少起了一孖。過去 24小時，inBetweeners 衝上 Opensea 排行榜第 6 位，Mint Price (起始一手價格) 0.27 ETH，Floor Price (二手市場最低入手價格)  由 12 月 20 日 嘅 0.396 ETH 升到 0.89 ETH。

inBetweeners 嘅畫師 GianPiero，係 Justin Bieber 主理的服裝品牌 “ Drew House ” 設計師，同時出過 “ Change Album ” 嘅週邊。

見 Justin Bieber 出 post 出 story 出盡奶力係各大社交平台「shill」(推銷) 呢隻野，雖然佢本尊無出來承認是否有份，但在 discord 交流頻道上就有人回覆幣家拎，話佢係 “ teamed up ”，回覆之後仲 delete 埋幣家拎嘅發問，果然「此地無銀 300 両」(可能依家叫「此地無銀 300eth」。幣家拎認為，佢有份搞真係唔出奇，不論回覆嘅人是不是 inBetweeners 團隊中人，起碼大家已經「覺得」Justin Bieber 有份，因為佢仲打晒人情牌，叫呢排紅到爆嘅第三代蜘蛛仔 Tom Holland 幫手出 story shill 埋一份，呢個陣容應該引左唔少粉絲 「fomo」。

主導 NFT 嘅，好多時係畫功同 marketing 相輔相成，畫功必需配包裝，但包裝未必要畫功。以 inBetweeners 呢隻 NFT 來說，小編就真係買唔落手，最主要係畫風畫風同畫風嘅問題（重要嘅野要講三次），簡單講，幣家拎見到佢嘅圓圈又不圓，線條又粗糙，加上部份嘅熊仔同某著名主題樂園嘅角色好鬼死似，但小編相信如有雷同，實屬巧合。如果我係主題樂園公司嘅老細，見到隻野咁都唔知告唔告佢好。Anyway，老散們會 fomo，某程度上係意料中事，不過如果單單靠「圈外」人脈，似乎比較難 keep 住個熱度；「圈內人」比較睇重嘅 roadmap 又好似冇咩誠意。

幣家拎深知有明星效應一定會升既道理，不過今次我無入場啦，原因正正係因為「有 marketing 無畫功」，幣家拎 feel 唔到可以持貨幾耐，所以呢一刻 miss 左最佳入場位嘅我就咬住條毛巾望住個 floor price，寧願踏空好過高追了。